Претседателот на Владата, Христијан Мицкоски, денеска престојуваше во Општина Брвеница, каде што присуствуваше на пуштањето во употреба на улицата „Коста Рацин“. Во изјава за медиумите тој се осврна на најновите податоци за економскиот раст.

„Државниот завод за статистика денеска објави дека бруто-домашниот производ во Македонија во вториот квартал е зголемен за 3,4%. Според податоците на Еуростат за 28 европски земји, Македонија го дели третото место со Хрватска, пред нас се Ирска и Кипар, а сите останати земји од регионот и пошироко се зад нас,“ изјави Мицкоски.

Тој нагласи дека ова е четврти квартал по ред со раст од над 3% и додаде дека очекува наскоро да се пробие и границата од 4%. „Ова се бројки, со нив нема политиканство и нема играње, тоа се факти кои се на страната на Владата предводена од ВМРО-ДПМНЕ,“ потенцира премиерот.