„Елиот инвестмент менаџмент“ е во преговори за купување удел во бугарското продолжение на гасоводот „Турски тек“, заедно со пристап до мрежа од центри за податоци, кабли за податоци и други инфраструктурни средства, објави „Волстрит џурнал“.
Во Бугарија, продолжението на „Турски поток“ е наречено „Балкански поток“, потсетува бугарски „Сега“.
Американскиот хеџ фонд, предводен од милијардерот Пол Сингер, неодамна потпиша договор за доверливост со бугарскиот државен оператор за пренос на гас „Булгартрансгаз“.
Покрај инвестирањето во инфраструктурната мрежа на компанијата, „Елиот“ размислува и за договор за рефинансирање на долгот на компанијата.
Преговорите се во почетна фаза, без гаранција за финализирање на договорот, а ни потенцијалната големина на инвестицијата не е јасна.
Гасоводот „Турски тек“ е последниот оперативен гасовод на Русија до Европа, откако другите врски беа прекинати или затворени по инвазијата на Украина.
До 2022 година, Русија беше најголемиот снабдувач на нафта и гас за Европа.
Рускиот претседател Владимир Путин во март изјави дека доколку САД и Русија постигнат договор за енергетика, Европа ќе добие евтин руски гас.
Гасоводот „Северен поток“, кој ги поврзува Русија и Германија, кој беше саботиран во 2022 година, е од особен интерес за Москва.
Рускиот министер за надворешни работи Сергеј Лавров претходно оваа година изјави дека Вашингтон и Москва разговараат за негово продолжување.
Американски фонд што инвестира во гасовод што ќе пренесува руски гас би можел да помогне во зголемувањето на снабдувањето со руско гориво, дури и кога европските лидери се обидуваат целосно да ги прекинат руските енергетски испораки…