Од израелски оган и воздушните напади загинаа најмалку 23 Палестинци во Појасот Газа, објави Ројтерс.
Повеќето од жртвите биле во близина на пункт за дистрибуција на помош што ја води Хуманитарната фондација Газа, поддржана од САД.
Медицинските лица во болниците Ал-Авда и Ал-Акса во централна Газа, каде што биле однесени повеќето од ранетите, рекоа дека најмалку 15 лица биле убиени додека се обидувале да стигнат до пунктот за дистрибуција на помош.
Останатите биле убиени во одделни напади во енклавата.
Министерството за здравство на Газа соопшти дека најмалку 274 лица се убиени, а повеќе од 2.000 се ранети во близина на пунктовите за дистрибуција на помош откако Хуманитарната фондација Газа започна со работа во енклавата.
Израелската војска денес им нареди на жителите на Кан Јунис и блиските градови Абасан и Бани Сухајла во јужниот дел на Појасот Газа да ги напуштат своите домови и да се упатат кон запад кон таканаречената хуманитарна зона, предупредувајќи дека ќе дејствува енергично против „терористичките организации“ во областа.
Војната во Газа избувна пред 20 месеци откако милитантите на Хамас го нападнаа Израел, зедоа 251 заложник и убија 1.200 луѓе, повеќето од нив цивили, на 7 октомври 2023 година – најсмртоносниот ден досега во Израел.
Во одмаздничката воена кампања на Израел загинаа речиси 55.000 Палестинци, повеќето од нив цивили. Поголемиот дел од населението е раселено, а неухранетоста е широко распространета.
И покрај напорите на САД, Египет и Катар за враќање на прекинот на огнот во Газа, ниту Израел ниту Хамас не покажаа никаква подготвеност да се откажат од своите основни барања, при што секоја страна ја обвинува другата за неуспехот да се постигне договор.