По пауза од седум години, денес одново ќе биде отворен комплексот „Македонско село“, лоциран на Водно, во близина на Нерези.
Нов концесионер на овој комплекс е компанијата „Ла Тераца“, чија понуда беше одбрана како најповолна на јавниот оглас објавен од страна на Службата за општи и заеднички работи, јави МИА.
Концесионерот е селектиран на легален и отворен начин, преку електронско јавно наддавање, користејќи го системот управуван од Министерството за финансии. Според најавите, на свеченото отворање ќе присуствува и премиерот Христијан Мицкоски.
Комплексот „Македонско село“ вклучуваше 12 оригинални куќи, со простории во кои беа претставени македонските занаети. Дел од куќите беа користени како хотелски соби, а имаше и угостителски дел.
Службата за општи и заеднички работи (СОЗР) смета дека со повторното отворање на комплексот ќе се “создадат услови за поттикнување на развојот на туризмот и зајакнување на локалната економија, отворање на нови работни места, а ќе биде унапреден и туристичкиот капацитет во Скопје што ќе влијае на зголемен број туристи не само во Скопје, воопшто и во земјава.”