Премиерот Христијан Мицкоски денеска остро реагираше на одлуката на Уставниот суд да поведе постапка за уставноста на линеарното зголемување на пензиите, поврзувајќи ја со наводни политички притисоци од претходната власт и барањата на судиите за повисоки плати. Тој ја поврза иницијативата на судијката Добрила Кацарска со случајот „Тенк“, тврдејќи дека истата судијка, која наводно водела политички мотивирани судења, сега „ги атакува пензионерите“ и сака да им го одземе правото на зголемување од 2.000 денари.
„Забележав дека во соопштението јасно стои дека имаат забелешки на процесот, начинот на судењето, нарушување на човековите права и отвораат предмет да го разгледаат тој процес. Ќе ве потсетам дека за вакви случаи ние подолго време зборуваме. Тоа се овие судии на кои им е мала платата, сакаат двојно, тројно поголема. Партиски октроирани и заробени од страна на претходната влада“, рече Мицкоски.
Тој додаде дека Стразбур веќе ги осудува македонските судења поради сериозни пропусти, а ваквиот судија „денес ги удира пензионерите за линеарното зголемување на пензиите“.
„Видете кој го водеше овој случај Тенк и видете каде се наоѓа тој судија денес. И не престанува тој судија денес ги атакува пензионерите за линеарното зголемување на пензиите, сака тоа право да им го одземе, а од друга страна бараат двојно, тројно поголеми пати. А гледате какви пресуди политички октроирани носат. За жал мораме да се срамиме и црвенееме пред Стразбур, поради ваквите малкумина судии кои за жал го контаминираат нашето судство и малкумина обвинители кои за жал го контаминираат нашето обвинителство.“
Мицкоски нагласи дека правосудството бара суштински реформи, а не зголемување на платите, кои и сега се „драстично поголеми“ од просечната во земјата.
„Јас уште еднаш ќе кажам, реформи во делот на судството и обвинителството се апсолутно потребни, но суштински реформи, а не зголемување на платите на овие судии кои што не ја заслужуваат ни оваа плата, која што е драматично поголема од просечната плата во државата. Така што, апсолутно да ја прочитав оваа информација која дојде од Стразбур и само таа е потврда за октроираното судство кое што за жал поединци внатре се заложници на претходната влада на СДСМ и ДУИ.“
Оваа изјава доаѓа по вчерашната одлука на Уставниот суд да отвори постапка за член 2 од Законот за пензиското осигурување, каде се сомнева дека линеарниот модел создава дискриминација меѓу пензионерите со различен стаж и придонеси.