Поплавени подруми, гаражи, дворови и одрони на одредени патишта евидентира Центарот за управување со кризи по обилните врнежи во земјава. На удар е западниот дел од земјата. Одрони има на патните правци Гостивар – Стража и Тетово – Бањиче поради што сообраќајот се одвива со повремени отежнувања. Пријавени се и поплавени станбени објекти во Кичево каде во тек е евакуација на жителите.
Поплавено е земјоделско земјиште и дел од дворови во тетовско, а ЦУК информира за излевање на реката Вардар во селото Балин Дол, како и излевање на Лукавичка река во селото Мало Турчане и Сушичка Река во селото Горно Бањице. Поголем одрон има и на патот село Татеши – село Мислодрежда. Во Охрид пријавени се поплавени подруми, гаражни и дворови на повеќе локации. Според ЦУК, засега стабилна е ситуацијата во Кумановско и Скопско.
Според последната информација на Центарот за управување со кризи, до 17:00 часот состојбата во поголемиот дел од Македонија е стабилна и не се бележат пречки во редовното функционирање, иако земјата е зафатена од значителни врнежи. Во Куманово, Липково, Старо Нагоричане, Крива Паланка, Ранковце и Кратово не е констатирано излевање на реки, ниту се регистрирани негативни последици од дождот. Општинските служби активно ја следат ситуацијата.
Во Кичево, бележиме поплави на стамбени објекти на улицата „Прилепска“, и во тек е евакуацијата на жителите. На терен работат екипи од Општина Кичево, Дирекцијата за заштита и спасување, Црвениот крст и другите надлежни институции. Во Струга, по пријава на итен повик, регистриран е поголем одрон на патот помеѓу селата Татеши и Мислодежда. Јавното претпријатие „Македонија пат“ е известено и презема мерки за санација. Во тетовско и гостиварско, регистрирани се одрони на патните правци Гостивар–Стража и Тетово–Бањиче, поради што сообраќајот се одвива со отежнувања.
Центарот за управување со кризи известува дека врнежите продолжуваат, а состојбата на теренот и водостоите на реките се следат постојано од сите надлежни институции.