Во информацијата со наслов „Земјите се поделени околу плановите за двостепена ЕУ“, натаму „Политико“ пишува: За да ги смири загриженостите на постојните членки дека поголема ЕУ би го отежнала донесувањето едногласни одлуки, Европската комисија размислува да им даде на новите членки целосни права на глас, само откако ЕУ ќе го преиспита начинот како таа функционира. Ова би им го отежнало на поединечните земји правото на вето и би спречило извртување на политиките. Во моментов, новите членки веднаш добиваат целосни права на глас, како што се случи кога најновата земја што се приклучи на ЕУ, Хрватска, влезе во 2013 година. Меѓу овластувањата, што првично би можеле да бидат ограничени, е правото на новите учесници да ги блокираат санкциите, меѓу другите прашања што во моментов бараат секоја земја од ЕУ да биде приклучена. Справувањето со заканите за вето од популистичките влади во Унгарија и Словачка се покажа како одземање многу време за лидерите.
Изгледите за приклучување без целосно право на глас предизвикуваат мешани реакции од земјите-кандидатки. Еди Рама, премиер на Албанија – која сега ги отвори сите таканаречени преговарачки кластери, низ кои ќе мора да работи – изјави за „Политико“ дека мерките се „добра идеја“ и оти неговата земја дури би прифатила за одреден временски период да нема свој комесар во Брисел. Албанија, рече тој, „не сакаше да ја оспори волјата на големите основачки членки како што се Франција и Германија“. „На крајот на краиштата, тие се возрасните во семејството кои ги носат важните одлуки“, рече тој, додавајќи дека „една предност за помалите членки на ЕУ е што ако поголемите земји „зае*аат нешто, тоа не е вина на новите членки“.
Висок молдавски функционер на Молдавија, кој побара анонимност за да зборува, изјави: „Полноправното членство со еднакви права и целосно учество во донесувањето одлуки во ЕУ мора да остане јасна и крајна цел.“ Црна Гора, најнапредната земја-кандидат на нејзиниот пат кон пристапување, исто така инсистира дека нема потреба да се преиспитуваат условите, под кои ќе ѝ биде доделено членство, искажувајќи очекување да заврши процесот на проверка оваа година.
Планот во врска со намалените права на глас беше предложен кон крајот на минатата година од страна на функционери и проевропски влади, за да се внесе живот во процесот на проширување, кој исто така е блокиран од Унгарија и неколку други престолнини, поради страв дека може да донесе несакана конкуренција за локалните пазари, или да ги компромитира безбедносните интереси. Унгарија постојано се закануваше дека ќе стави вето на приклучувањето на Украина кон ЕУ. Комесарот за проширување на ЕУ, Марта Кос, изјави за „Политико“ дека конкретни предлози ќе бидат изнесени „во февруари или март“.
Таа додаде дека „целосно нов елемент“ поттикнува ново чувство на итност: „Имаме надворешни деструктивни сили кои би сакале да не видат како пропаѓаме – тие работат против нашите земји-кандидатки, но ние сме главната цел“. Планот ќе треба детално да го развие Европската комисија пред да им биде презентиран на националните лидери и веројатно да се расправа за него на идните самити на Европскиот совет, како и да биде оценет од правници за да се види како се вклопува во основните договори на ЕУ. – објави денес „Политико“.