Ана Цветановска го подобри својот резултат на 10 километри интервал старт слободно на 25. Зимски олимписки игри во Милано-Кортина во однос на претходните во Пекинг, доволно за 105. место меѓу 108 натпреварувачки со пласман, а три не ја завршија трката.
Македонската нордијка ја истрча патеката на скијачкиот стадион „Тезеро“ во Вал ди Фиеме за 31:32,4 минути и заостана 8:43,2 минути зад победничката Фрида Карлсон од Шведска, споредено со +11:51,40 мин. во однос на олимписката шампионка во Пекинг пред четири години.
Цветановска ги остави зад себе претставничките на Србија, на Малта и на Мексико, а на целта не стигнаа претставничките на Босна и Херцеговина, Бразил и Исланд.
Во истата дисциплина, но во машка конкуренција, утре од 11:45 часот ќе настапи македонскиот знаменосец на свеченото отворање Ставре Јада, кому ова му е трета олимпијада.