Американскиот претседател Доналд Трамп објави дека даноците ќе започнат да важат на 1 август и дека нема да има повеќе одложувања. “Немаше промени до овој датум, ниту пак ќе има промени.”
- “Со други зборови, сите пари ќе доспеат за плаќање почнувајќи од 1 август 2025 година”, напиша тој на Truth Social.
Трамп додаде дека некои држави за кои се воведуваат давачки, биле информирани писмено вчера, додека други ќе добијат официјална нотификација во текот на денот. Трамп извести најмалку 14 држави за новите тарифни стапки кои ќе стапат на сила на 1 август, со напомена дека ваквата царинска политика би можела да се измени со спогодба во областа на трговијата.
За Јапонија и Јужна Кореја е утврдена царина од 25 проценти. Ист процент на царина е утврден и за Малезија, Казахстан и Тунис.
На Јужна Африка и Босна и Херцеговина им се воведени давачки од 30 проценти, на Индонезија 32 проценти, на Бангладеш и Србија 35 проценти, на Камбоџа и Тајланд 36 проценти, а на Лаос и Мјанмар 40 проценти.
Трамп во писмата ги предупреди земјите против воведување реципрочни мерки, нагласувајќи дека САД во тој случај ќе реагираат со воведување дополнителни давачки. Трамп во април објави основна царинска стапка од 10 проценти за повеќето земји и дополнителни давачки кои достигнуваат до 50 проценти. Потоа го одложи започнувањето на новите давачки до 9 јули за сите освен за оние земји на кои им беше одредена стапка од 10 проценти.