Поради санкциите, откажаните летови и другите ограничувања поврзани со инвазијата врз Украина, доаѓањето на туристи од Западот е речиси целосно запрено – тренд на опаѓање што продолжи и во првата половина на 2026 година, пренесува „Еуроњуз“
Една од клучните мерки е воведувањето безвизен режим за државјаните на Виетнам. Указот потпишан од претседателот Владимир Путин стапува на сила овој четврток и се однесува на туристи, деловни патници, членови на делегации и лица во транзит. За виетнамските државјани кои планираат подолг престој, работа или студирање во Русија, визата и понатаму ќе биде задолжителна.
Во меѓувреме, Виетнам стана третата најпопуларна дестинација за руските туристи. Според Националната управа за туризам на Виетнам, во првите девет месеци од 2026 година се евидентирани 1,13 милиони доаѓања од Русија. Ова претставува зголемување од 160 отсто, со што Русија станува третиот најголем пазар за виетнамскиот туризам.
И кинеските туристи пристигнуваат, но побавно од очекуваното: Кон крајот на 2025 година, Русија постигна сличен безвизен договор и со Кина. Иако бројот на кинески туристи расте, досегашните резултати се под владините проекции.
Планот беше до крајот на оваа година да се достигне бројка од 4,2 милиони посетители од Кина, а до 2027 година – 5,5 милиони. Сепак, во првата половина на 2026 година пристигнаа само околу 516.000, а аналитичарите сметаат дека ова темпо е пребавно за да се оствари целта.
Безбедносните грижи се наведуваат како една од можните причини за побавниот прилив на кинески туристи.