Светскиот ТВ канал CNN ја вброи нашата Македонија меѓу дестинациите што заслужуваат многу поголемо внимание од туристите, опишувајќи ја како „скриен бисер“ во Јужна Европа. Во својата рубрика за патувања, медиумот нагласува дека, иако најголемиот дел од туристите традиционално се насочуваат кон земји како Франција, Шпанија и Италија, континентот крие многу помалку откриени, но исклучително вредни дестинации – меѓу кои се издвојува и Македонија.
Македонија е претставена како „драматично планинска земја“, сместена северно од Грција, со импресивни природни пејзажи – од зелени ридови и планински врвови до карпести предели кои нудат автентично доживување за љубителите на природата.
Посебен акцент е ставен и на гастрономијата, која се менува од регион до регион и нуди богата палета вкусови, како и на климатските услови што овозможуваат производство на квалитетен зеленчук и развој на лозарството и винската индустрија.
Медиумот го издвојува и Скопје како град што нуди уникатен спој на модерно и традиционално, но и националните паркови и планинските региони, кои се сè поатрактивни за авантуристички туризам.
Оценките на CNN доаѓаат во време кога туристите сè повеќе бараат автентични искуства надвор од стандардните европски рути, што дополнително ја позиционира Македонија како дестинација со голем потенцијал.
Ваквото меѓународно признание се очекува да придонесе за зголемен интерес кај странските посетители и зацврстување на имиџот на Македонија на светската туристичка мапа.