Градот Скопје ја поздравува организацијата на регионалната конференција „Leading Change: People-Centred Paths to Demographic Resilience“, која отвора исклучително важни прашања за иднината на нашиот регион.
За нас, како главен град на Македонија, демографските предизвици не се само стратешко прашање, туку секојдневна реалност, објави на Фејсбук Градоначалникот Орце Ѓорѓиевски.
Во објавата, вели дека иселувањето на младите, стареењето на населението и потребата од подобри услови за живот бараат одговорни, храбри и конкретни политики.
„Токму затоа, локалната самоуправа има клучна улога.
Решенијата мора да започнат таму каде што граѓаните живеат, работат, создаваат семејства и ја градат својата иднина.
Во Скопје, со поддршка од Владата на Република Македонија работиме на мерки и политики што ги поддржуваат младите, семејствата и сите генерации преку подобри јавни услуги, инвестиции во образование, социјална заштита, урбан развој и создавање поинклузивни и одржливи заедници.
Целта е Скопје да биде град во кој младите ќе сакаат да останат, семејствата ќе имаат услови да се развиваат, а секој граѓанин ќе има можност за достоинствен и квалитетен живот.
Верувам дека преку регионална соработка, размена на добри практики и силно партнерство со меѓународните организации, можеме да изградиме поотпорни општества подготвени да одговорат на предизвиците на времето.
Скопје останува отворен партнер, активен чинител и град кој не чека промените да се случат, туку учествува во нивното создавање.
Иднината се гради со луѓето, за луѓето и за генерациите што доаѓаат.