Првиот систем „Патриот“ за Украина, за кој Германија ќе плати, ќе биде готов најрано за шест до осум месеци, објави „Билд“.
Системот сè уште го произведува американската компанија за оружје „Raytheon.“.
Германија ја разгледува можноста да ѝ обезбеди на Украина уште еден систем „Патриот“ од залихите на Бундесверот, заменувајќи го со нов подоцна. Но, за тоа би била потребна нова нарачка од „Raytheon.“, а испораката би траела со години, се вели во статијата на Билд.
Според извори во германските владини кругови, првичниот план бил САД да ја снабдуваат Украина со оружје од сопствените залихи, а Германија да ги покрие трошоците преку претходна нарачка.
Сепак, американскиот претседател Доналд Трамп инсистираше дека Пентагон не може да обезбеди ниту еден од своите системи за воздушна одбрана, а Европа мора да најде такви системи од сопствените залихи.
Билд забележува дека во Европа има недостиг од системи за воздушна одбрана, а преговорите за тоа кој може да ѝ помогне на Украина траат веќе неколку дена.
На почетокот на војната во Украина, германската армија имала 12 системи „Патриот“. Три од нив веќе се испорачани во Украина. Според публикацијата, три системи моментално се модернизираат и не се подготвени за употреба, а уште еден се користи за обука на воен персонал. Два се распоредени во Полска за да го чуваат аеродромот преку кој НАТО транспортира оружје до Украина.
Ова значи дека Германија моментално има максимум три системи за сопствени потреби за воздушна одбрана. Доколку се испорача друг систем, ќе останат само два.
Ситуацијата нема да се подобри уште неколку години. Претходната коалициска влада нарача осум нови комплекси „Патриот“. Првиот треба да влезе во воздухопловните сили до крајот на 2026 година, а останатите до 2029 година.