Премиерот Христијан Мицкоски порача дека добрососедските односи меѓу Македонија и Бугарија мораат да бидат двонасочен процес и дека Скопје нема да отстапи од своите позиции сѐ додека не види конкретни резултати од бугарска страна.
Реагирајќи на изјавата на бугарската министерка за надворешни работи, Велислава Петрова, дека Македонија треба да бара решенија, а не проблеми, Мицкоски истакна дека е загрижен од почетокот на работата на новата бугарска влада. Сепак, тој изрази надеж дека со текот на времето ќе надвладее рационалниот пристап.
Премиерот потсети дека Бугарија моментално се соочува со сериозни внатрешни предизвици, меѓу кои економски проблеми, висока инфлација и буџетски дефицит, што, според него, влијае и на актуелните теми поврзани со Македонија.
Тој повтори дека македонската страна постојано нуди решенија, но дека Бугарија не ги почитува преземените обврски. Мицкоски посочи дека на маса стојат најмалку 14 пресуди од Европскиот суд за човекови права во Стразбур кои остануваат неизвршени.
„Нема да прифатиме уцени и булинг во процесот на евроинтеграции. Европските вредности мораат да важат подеднакво за сите“, нагласи премиерот.
Мицкоски беше категоричен дека Владата нема да попушти:
„Сѐ додека сум јас премиер и додека не видиме испорака од нивна страна, ние нема да се поместиме ниту милиметар.“