Основното јавно обвинителство Скопје поведе постапка против 36-годишен скопјанец, осомничен за кривичните дела телесна повреда, загрозување на сигурноста и предизвикување општа опасност, по тежок инцидент на семејно насилство што се случил синоќа во неговиот дом.
Според Обвинителството, околу полноќ осомничениот физички ја нападнал сопругата и нејзината мајка. Потоа почнал да им се заканува на сопругата и на нивните две малолетни деца (на возраст од шест и четири години), викајќи дека ќе ги убие сите присутни, па дури и дека ќе го задави сопственото дете.
Кога сопругата побарала да престане, тој ја оттурнал и ѝ нанел телесни повреди. Во продолжение кршел покуќнина, а со клуб маса замавнал кон мајката на сопругата, повредувајќи ја во пределот на ногата и градниот кош. Во еден момент извадил нож и замавнувал со него, предизвикувајќи страв и чувство на загрозеност кај присутните.
Сопругата успеала да ги повика татко ѝ и брат ѝ, но осомничениот продолжил да им се заканува и ним. Потоа од боксот во дворот го пуштил своето куче од расата шарпланинец, кое нападнало еден од оштетените и го гризнало за надлактицата и потколеницата.
Имајќи ја предвид тежината на дејствијата, опасноста од бегство и можноста осомничениот да го повтори насилството, јавниот обвинител до судијата на претходна постапка доставил предлог за определување мерка притвор.