На известувачот за Македонија во Европскиот парламент, Томас Вајц, на листата неомилени во Бугарија му се придружи и унгарскиот премиер Петер Маѓар поради неговите ставови во прилог на западниот бугарски сосед и неговата евроинтеграција.
„Разговарав со бугарски европратеници кои ми кажаа дека го информирале Маѓар за бугарската позиција и за суштината на проблемите во Скопјe. Бидејќи тој продолжува да ги повторува истите тези, очигледно е во прашање свесно политичко однесување“, изјави Спас Ташев, професор по национална безбедност и директор на одделот „Демографија“ во Бугарската академија на науките (БАН), во интервју за бугарски „Телеграф“.
„Изјавите на Маѓар треба внимателно да се разгледаат. Тие се дел од пошироко прегрупирање на влијанието на Балканот, во кое Северна Македонија станува поле на конкуренција помеѓу различни геополитички центри кои би сакале да имаат свој Тројански коњ во Европа. Ова не се добри вести ниту за Бугарија, ниту за Европската Унија. Европа тешко може да биде силна во странство ако дозволува такви линии на поделба во себе“, заклучува основачот и прв директор на Бугарскиот културно-информативен центар во Скопје во одговорот на прашањето „Како го толкувате ставот на унгарскиот премиер Маѓар дека Северна Македонија неправедно е забавувана на нејзиниот пат кон ЕУ?“.
Во Бугарија не ја криеја радоста од победата на Маѓар над Виктор Орбан на последните парламентарни избори во Унгарија, надевајќи се на пресврт во унгарската наклонетост кон Македонија, но надежта за тоа полека избледува по неколкуте изјави на претседателот на Владата во Будимпешта, во кои отворено се заложи Западен Балкан да има предност пред Украина на патот кон ЕУ, притоа апострофирајќи го неправедниот однос на Брисел кон Скопје.
Претседателката Гордана Силјановска, која денеска учествуваше на состанокот на Северноатлантскиот совет на ниво на шефови на држави и влади, во рамки на Самитот на НАТО во Анкара, имала подолг разговор со Маѓар, кој кажал дека уште позасилено ќе застане зад Западен Балкан, дека целосно нè поддржува и оти е неминовно, за да има стабилност и мир на Балканот, земјите од Западен Балкан да станат членки на Европската Унија.