Откако физиотерапевтката Меланија Цветковска од Куманово јавно побара помош од институциите, тие реагираа такашто нејзиниот насилен татко П.Ц. го сместија во Психијатриската болница во Демир Хисар.
„Ве информираме дека Секторот за внатрешни работи Куманово е запознаен со случајот и интензивно се работи на негово расчистување. По консултација со Основното јавно обвинителство и други надлежни институции ќе бидат преземени конкретни мерки против П.Ц. од Куманово. Лицето се спроведува во Психијатриската болница Демир Хисар, а по претходно добиено решение од Основниот суд Куманово“, соопшти СВР Куманово.
Цветковска во видео порака на Инстаграм побара институциите да ѝ помогнат да биде хоспитализиран нејзиниот татко со дијагноза дека е алкохоличар. Тој вчера бил пријавен во полиција за закана со убиство кон нејзината мајка и негова сопруга, но таа држела в раце тавче со врело масло од пржење јајца и така се одбранила.
Од полицијата насилникот бил пренесен во психијатриското одделение во кумановската болница, од кадешто требаше да излезе утро изутрина, но по реакцијата од институциите лицето е одведено на лекување во Демир Хисар.