Девојка од Куманово во видео порака на Инстаграм бара институциите да ѝ помогнат да биде хоспитализиран нејзиниот татко со дијагноза дека е алкохоличар.
Тој вчера бил пријавен во полиција за закана со убиство кон мајката на девојката и негова сопруга, но таа држела в раце тавче со врело масло од пржење јајца и така се одбранила. Од полицијата насилникот бил пренесен во психијатриското одделение во кумановската болница, кадешто и сега се наоѓа, но утро ќе излезе.
„По 48h часа тој ќе биде пуштен дома утре, а ние не сме на безбедно. Само сакаме да бидеме слушнати и да помогнеме вакви личности, кои не се свесни дека имаат сериозни проблеми, а во исто време сериозно наштетуваат на свои блиски, да бидат сместени во соодветни институции и сите да бидат на безбедно“, вели девојката во видео на Инстаграм.
Од болницата во Куманово се јавиле во Психијатриската болница во Бардовци, за кадешто таткото има упат, но од таму им кажале дека нема место бидејќи се реновира оддел. Според сопругата, ни во болницата во Демир Хисар немало да го примат човекот на лекување.
„Секторот за внатрешни работи Куманово е запознаен со случајот и интензивно се работи за негово расчистување. По консултација со Основно јавно обвинителство и со други надлежни институции ќе бидат преземени конкретни мерки против П.Ц. од Куманово“, велат од Министерството за внатрешни работи.