Одбојкарската репрезентација на Македонија со стил го заврши своето четврто учество на европските првенства, совладувајќи го Израел со 3:0 во Софија, по сетови 25-21, 25-23 и 25-22.
„Среќни сме и задоволни, бидејќи покажавме како можеме да ја играме нашата игра. Тоа беше одличен настап и го завршивме првенството со добра игра. Македонските навивачи беа толку гласни што можевме да ја почувствуваме нивната енергија, а тоа дефинитивно ни помогна денеска“, изјави Филип Савовски по мечот.
Единствената победа на шампионатот по четирите максимални порази ги искачи „црвено-жолтите“ на петтото место во групата Б, оставајќи ги Израелците зад нив и спречувајќи ги да се пласираат во осминафиналето.
Избраниците на селекторот Јошко Миленкоски одлично го отворија мечот во арената „8888“, поведувајќи со 12-7, ривалот израмни на 19-19, но завршницата им припадна на македонските одбојкари, кои беа подобри и во нападот (67:48 проценти), и во приемот (48:37 отсто).
Цврстиот македонски блок донесе водство од 22-18 во вториот сет, Израел се закани намалувајќи на 24-23, но Македонците повторно најдоа решение да го освојат и вториот период од играта.
И третиот сет донесе неизвесност, која македонскиот тим почна да ја намалува со водството од 17-15 и успеа да го приведе и овој сет кон крајот во своја полза.
Македонија ја заврши средбата со подобра реализација во нападот (55:45 отсто), подобар сервис (3:0 во асови) и со помалку неизнудени грешки (17:19, од кои Израел направи дури 10 само во третиот сет).
Капитенот Никола Ѓорѓиев уште еднаш беше најдобар поединец во македонската репрезентација со 20 поени, пред Стојан Илиев со 14.