Четворицата кандидати за амбасадори во Бугарија, Норвешка, Шведска и Романија денеска пред собраниската Комисија за надворешна политика и надворешна трговија ги претставија своите приоритети и планови за дипломатскиот ангажман.
Крум Ефремов, кој треба да ја предводи амбасадата во Бугарија, најави заложби за подобрување на билатералните односи, но и за надминување на актуелните политички предизвици.
„Неопходна е промена на пристапот преку деескалација во односите и правење на позитивна клима“, рече Ефремов, посочувајќи дека прашањето со бугарската блокада на евроинтеграциите останува најголем предизвик.
Тој најави и поголема соработка во економијата, туризмот, енергетиката и инфраструктурата, како и активирање на политичкиот дијалог на сите нивоа.
Дритон Кучи, кој треба да го продолжи мандатот во Норвешка, најави нова динамика во политичките, економските, безбедносните и конзуларните односи.
„Моја цел ќе биде да го зачувам постигнатото, но и да внесам нова динамика“, рече Кучи.
Како приоритети ги посочи европската интеграција, НАТО-соработката, економската дипломатија, како и подобрувањето на конзуларните услуги за македонските граѓани во Норвешка.
Во Шведска, Мухарем Јусуфи најави фокус на економската дипломатија и на поголема шведска поддршка за европската перспектива на Македонија.
„Особен акцент ќе биде ставен на економската дипломатија преку зголемување на трговската размена, привлекување на шведски инвестиции и создавање нови деловни партнерства“, рече Јусуфи.
Како области со потенцијал ги посочи ИТ-секторот, енергетиката, земјоделството, туризмот и зелените технологии.
Габриел Атанасов, кој повторно треба да биде амбасадор во Романија, како еден од главните приоритети го посочи подобрувањето на меѓусебната перцепција и зголемувањето на контактите меѓу двете земји.
„Една од најважните работи е креирање на позитивна перцепција во двете држави – и за Романија во Македонија, и за Македонија во Романија“, рече Атанасов.
Тој посочи дека економската соработка е особено важна и најави заложби за привлекување повеќе романски инвестиции во Македонија.