Во малото питорескно место Касале Сул Силе во близина на градот Тревизо во регионот Венето се случил невообичаен инцидент во кој учествувал насилник со македонски пасош.
Возејќи автомобил насилникот удрил а потоа и усмртил две овци од стадо.
Притоа му се заканувал и му викал на офчарот и сопственик на стадото овци низ кое со возилото поминал возачот.
Како последица на овие дела, а по пријава на полицијата, италијанското јавно обвинителство против 36-годишен македонски државјанин поднесло обвинение.
Насилникот наскоро треба да се појави пред судија каде го очекува казна затвор до 48 месеци.
Во Италија според строгиот закон за заштита на животните (познат како Закон Брамбила) кој стапи на сила во јули 2025 година, за убиство на животно сторителот може да добие од 6 месеци до 4 години затвор, како и парична казна до 60.000 евра.
Овој закон ги признава животните како чувствени суштества кои имаат свои права, со што значително се зголемија претходните казни.
Правните санкции во Италија се поделени во неколку категории.
За неоправдано убиство, особено ако е извршено со суровост или му претходи продолжено страдање на животното, казната изнесува од 6 месеци до 4 години ефективен затвор.
За намерно нанесување повреди, мачење или тешка злоупотреба, предвидена е затворска казна до 2 години и парична глоба до 30.000 евра.
Доколку мачењето или убиството на животното е снимено и споделено на социјалните мрежи (интернет) или пак е извршено во присуство на малолетници, затворските казни се дополнително зголемени и судот почесто изрекува максимални санкции.