Претседателот на ВМРО-ДПМНЕ и премиер Христијан Мицкоски синоќа на митингот на партијата во Брвеница ја обвини СДСМ дека се противи на владините политики и инвестиционите проекти, оценувајќи дека опозициската партија нема поддршка за, како што рече, развојот на државата.
Тој нагласи дека опозицијата постојано се спротивставува на сите владини проекти и развојни инвестиции, додека истовремено застапува сосема поинакви бизнис интереси.
Мицкоски рече дека, од СДСМ секојдневно доаѓаат нови обвинувања и прес-конференции кои ги оцени како „темелени на лаги, измислици и клевети“.
Тој продолжи со обвинувања кон опозицијата, тврдејќи дека нејзините политики се насочени кон распродажба на државата и лично богатење.
„ Тие се да ја распродаваат Македонија, да им ставите бел лист хартија, тие ќе потпишат сè само да не треба тие да го платат, само да можат да го платат граѓаните и Македонија, а тие да може што повеќе да украдат од истите и да стават во своите џебови – рече тој.
Според него, граѓаните треба да ги препознаат вистинските намери што стојат зад секојдневните партиски напади.
Првиот човек на Владата дополнително посочи дека опозициските функционери во минатото прифаќале штетни договори само за да го оштетат државниот буџет за сметка на сопствениот профит. Тој констатираше дека сегашните реакции се исклучиво обид за манипулација на јавноста.