Од партијата велат дека јавните изјави за случајот отвориле дополнителни дилеми за начинот на кој било постапувано и за оправданоста на преземените медицински чекори.
„Сакајќи да се извлечат од случајот со Ива Михаилова, Барбов, Филипче и Заев дополнително се заплеткаа во сопствените лаги. Така, обидувајќи се да се дистанцира од случајот и да се претстави како некој што не бил запознаен со сите околности, докторот Барбов отвори дополнителни дилеми за начинот на кој постапувал и за оправданоста на преземените медицински чекори“, велат од ВМРО-ДПМНЕ.
ВМРО ДПМНЕ прашува како е можно невролог да дава мислење за хируршки интервенции и врз која основа била дадена конзилијарна препорака, доколку пациентката не била упатена на лекарски конзилиум и не поднела барање за конзилијарно мислење.
„Зошто пациентка по претрпена траума, Барбов не ја упатил на соодветен преглед кај неврохирург или трауматолог и дали заедно со Филипче и Заев сакале да му направат услуга на Румен Радев со тоа што набрзина сакале да го затворат случајот и Михаилова да ја упатат на лекување во Бугарија?“, истакнуваат од ВМРО-ДПМНЕ.
Од партијата додаваат дека билатералната соработка меѓу Македонија и Бугарија во областа на здравственото осигурување не значи дека може да се постапува произволно, туку дека мора да се почитуваат пропишаните правила за упатување пациенти на лекување во странство.
ВМРО-ДПМНЕ смета дека со препораката за лекување во Бугарија биле надминати надлежностите и бара одговори за постапките, улогите и одлуките на сите инволвирани.