МТЕЛ е добитник на признание за брзорастечка компанија на престижниот бизнис настан „Бизнис лидер 2026“, кој се одржа на 15 октомври во Македонската филхармонија, во присуство на претставници на водечките компании, институциите и бизнис-заедницата во Македонија. На настанот се обрати и претседателот на Владата, Христијан Мицкоски, кој го истакна значењето на успешните компании, претприемништвото и инвестициите за развојот и конкурентноста на македонската економија.
Признанието за МТЕЛ доаѓа во годината кога компанијата одбележува пет години од своето работење на македонскиот пазар и претставува значајна потврда за нејзиниот динамичен развој, континуираното проширување на понудата и амбициозната деловна стратегија.
Како дел од Телеком Србија Групацијата, МТЕЛ за релативно краток период изгради препознатливо присуство на пазарот, развивајќи портфолио на телекомуникациски и дигитални услуги. Преку телевизиската платформа MOVE, мобилните услуги и воведувањето нови дигитални решенија, компанијата континуирано инвестира во подобрување на корисничкото искуство и создавање дополнителна вредност за своите корисници.
- „Ова признание има особено значење за нас бидејќи го добиваме токму во годината кога МТЕЛ слави пет години постоење во Македонија. Тоа е потврда за посветеноста на нашиот тим, довербата на корисниците и поддршката од Телеком Србија Групацијата. Нашата амбиција не е само да растеме, туку да градиме компанија која носи иновации, нови можности и долгорочна вредност на македонскиот пазар“, изјави генералниот директор на МТЕЛ Марко Лопичиќ.
„Бизнис лидер“ е платформа за препознавање на деловните достигнувања на компаниите во Македонија, при што признанијата се темелат на анализи на финансиските резултати, растот и деловната стабилност. Со ова признание, МТЕЛ добива дополнителен поттик да продолжи со реализација на своите развојни планови, проширување на услугите и зајакнување на својата позиција како современа телекомуникациска компанија ориентирана кон потребите на корисниците.
