Возачот Васил Јованов кој ја прегази Фросина Кулакова на пешачки премин на „Партизанска“ во јануари годинава е осуден на 12 години затвор.
Според обвинението, на 29 јануари 2025 година, Васил Јованов, без возачка дозвола и под дејство на алкохол, управувал возило со брзина од 91 километар на час на булеварот „Партизански одреди“ во Скопје.
На пешачки премин, на црвено светло, удрил во Фросина Кулакова, која поминувала на зелено светло за пешаци.
Од силата на ударот, Фросина се здобила со тешки телесни повреди и починала на лице место.
Судијката Снежана Марковска рече дека најниската казна за делото за кое се гони Јованов е четири години, а највисоката е 20 години.
„Обвинетиот Васил Јованов е виновен. Судот обвинетиот го осудува на казна затвор во траење од 12 години. Му се изрекува и забрана за управување со моторно возило“, рече судијката Снежана Марковска.
Таткото на Фросина Кулакова, Тодор, револтиран од висината на казната, ја напушти судницата.
„Судот е мафија!“, рече тој и излезе од салата.
Васил Јованов има право на жалба, но не за изречената казна затвор туку само за висината на казната односно 12 години затвор.
Ваквата пресуда доаѓа откако Јованов на претходното рочиште призна вина по што пред судот беа изнесени само доказите кои се однесуваат на висината на казната.