Али Ахмети никако да прежали и да се помири со тоа што ДУИ замина во опозиција по 22 години на власт, обвинувајќи го за тоа лидерот на ВМРО-ДПМНЕ и премиер Христијан Мицкоски.
„Оној што ќе ги добие изборите е легитимен претставник. Оној што ќе ги изгуби изборите, нека работи за да ги добие следните избори. Зошто Албанците да одат на избори, кога Христијан може да избере кого сака, кого го има за пријател и кого може да го намами во својот скут?“, праша лидерот на интегративците во својот говор на Изборното собрание на огранокот во Желино.
Ахмети го повтори својот став дека изборите се основа на демократскиот легитимитет и оти нивните резултати мора да бидат почитувани од сите политички партии, иако самиот по изборите во 2016 година, на кои во македонскиот блок победи ВМРО-ДПМНЕ, не го испочитува т.н. Мајски договор за формирање влада по принципот победник со победник.