Дирекцијата за заштита и спасување (ДЗС) денес упати апел до сопствениците на угостителски објекти и организаторите на јавни забави во пресрет на новогодишните прослави строго да ги почитуваат противпожарните мерки и безбедносните правила.
Директорот на ДЗС, Стојанче Ангелов, нагласи дека безбедноста мора да биде приоритет пред профитот и бројот на гости.
„Ниту една прослава, ниту една забава не вреди повеќе од човечкиот живот. Апелираме до сопствениците и организаторите строго да го почитуваат дозволениот број посетители, да обезбедат исправна противпожарна опрема и слободни излези за евакуација“ – изјави Ангелов.
Посебен акцент е ставен на забраната за користење пиротехника и отворен пламен во затворени простории, како и на обврската излезните врати да бидат постојано отклучени и проодни.
„Излезите мора да бидат отклучени и постојано проодни. Забрането е користење пиротехнички средства и отворен пламен во затворени простории, бидејќи токму ваквите пропусти најчесто доведуваат до трагични последици“ – предупреди Ангелов.
Од ДЗС потсетуваат дека секој објект мора да располага со исправна и редовно одржувана противпожарна опрема, а персоналот да биде обучен за реакција во итни ситуации.
„Почитувањето на овие мерки не е само законска обврска, туку и морална одговорност кон гостите и вработените. Нашата цел е новогодишните прослави да поминат во весела, но пред сè безбедна атмосфера“ – додаде директорот.
Институцијата се заблагодари на медиумите за подигањето на јавната свест и повика на заедничка одговорност за да се избегнат несакани инциденти за време на празниците.