Дали Европската Унија ќе биде унија на стандарди или унија на двојни стандарди е дилемата која што претседателката Гордана Сиљановска Давкова го постави на ,,Конкордија” самитот во Њујорк кој се одржува за време на Генералното собрание на ОН.
Пред водечки луѓе од светот на политиката, бизнисот, медиуми, невладини организации претседателката ги спореди проблемите на Светската организација во изнаоѓање мир во светот со проблемот на проширувањето со кој се соочува ЕУ.
,,Она што се ОН за светот, ЕУ е за Европа, мултилатерален проект со една врвна цел: мир на континентот.
Тоа се постигнува преку проширувањето врз основа на Kопенхагенските критериуми: демократија, владеење на правото, човекови права и слободи, и пазарна економија.
На самитот ,,Конкордија”, којшто се одржа на маргините на Генералното собрание на ОН во Њујорк посочив дека ЕУ не може да го брани мултилатерализмот во светот ако го изневерува на својот континент”, порача Сиљановска Давкова.
Според неа од Брисел зависи дали ЕУ ќе биде унија на правила или заедница на двојни стандарди.
,,Проширувањето не е техничко прашање, туку тест за тоа дали ЕУ ќе го одбере патот на concordia или discordia, дали ќе биде Унија на правила и стандарди, или Унија на двојни стандарди и контрадикции.
Ние можеме да направиме се што е потребно во економијата, реформите, но сепак, нашите преговори зависат од нашите соседи.
За разлика од Скандинавија која ги поддржа балтичките земји за ЕУ нашите соседи често користат вето при приемот на нови членки.
За членство е потребен консензус и ако една земја не се согласува, не можете да станете членка на ЕУ. Затоа, крајно време е да се направат промени во ЕУ за начинот на одлучување, што неодамна го потенцираше и претседателката на ЕК, Урсула Фон дер Лајен”, објави Сиљановска Давкова на својот Фејсбук профил.