Кандидатот за градоначалник на Град Скопје од ВМРО-ДПМНЕ, Орце Ѓорѓиевски, денеска на прес-конференција го претстави еден од седумте столбови од својата изборна програма под наслов „Скопје – град на слоеви, град на култура“.
– Скопје е град со историја, карактер и душа. Денес не зборуваме само за улици и инфраструктура, туку за тоа каков град сакаме да изградиме – град што се развива, но не ја губи својата душа – изјави Ѓорѓиевски.
Тој истакна дека културната стратегија се темели на три насоки: ревитализација на јавните простори, развој на културната инфраструктура и системска поддршка на културниот развој.
Според Ѓорѓиевски, време е културното наследство да престане да биде жртва на негрижа.
– Аквадуктот ќе го претвориме во современ културен парк – со сцени за концерти, фестивали и зелени површини. Ќе го изградиме и најдолгиот ѕид за мурали во Југоисточна Европа како симбол на младинската енергија и урбаната уметност – најави кандидатот.
Археолошкиот локалитет Скупи ќе биде целосно уреден и отворен за јавноста, со театарски претстави, уметнички резиденции и фестивали.
Посебен акцент Ѓорѓиевски стави на обновата на Старата скопска чаршија, која, како што рече, „ќе го задржи својот автентичен дух, но ќе се отвори кон современи содржини“.
– Скопското Кале ќе стане жив културен центар со сцени за фестивали, концерти, изложби и едукативни настани. Ќе ја споиме меморијата на минатото со современата креативност – нагласи тој.
Ѓорѓиевски најави и реконструкција на Кино „Милениум“, унапредување на работата на МКЦ, Музејот на град Скопје, Културно-информативниот центар и другите институции под надлежност на Градот.
– Скопје ќе стане град на фестивали – град што живее преку културата цела година. Ќе поддржиме реномирани настани како „Skopje Jazz Festival“, „Пиволенд“, „Скопје танцува“, „Баскерфест“, „Skopje Calling“ и многу други – рече Ѓорѓиевски.
Тој додаде дека визијата е Скопје да стане град на уметноста, идеите и луѓето.
– Културата е инвестиција во иднината. А иднината на Скопје ја гледам како град што создава, инспирира и обединува – заврши Ѓорѓиевски.