Управата за хидрометеоролошки работи (УХМР) прогнозира сончево и многу топло време денеска со мала до умерена локална облачност.
Утринската температура ќе биде од 10 до 20 Целзиусови степени, а дневната од 30 до 41 степен.
И во Скопје се очекува сончево и многу топло време со слаб ветер од северен правец. Температурата ќе се движи од 20 степени наутро до 41 во текот на денот.
Сончево и многу топло време ќе има и утре, а во попладневните и во вечерните часови на некои места ќе има појава на нестабилност со пороен дожд и грмежи, кои локално ќе бидат во форма на невреме со засилен ветер и услови за појава на град.
Пад на температурите за неколку степени се очекува во деновите од викендот кога ќе дува умерен до засилен ветер од северен правец.