Охрид го задржува статусот на еден од најскапите градови за купување недвижности во земјава. Пазарот и понатаму бележи висок интензитет, проследен со постојана побарувачка, активна изградба и цени кои остануваат на високо ниво.
Па така, како што објави ТВ 24, за нов стан во поширокото градско и централно подрачје цените се движат од 1.500 до 2.500 евра за метар квадратен. На најатрактивните локации – во строгиот центар и на самиот брег на езерото – цените го достигнуваат максимумот и надминуваат 3.000 евра за квадрат, особено кај луксузните комплекси. Попристапна варијанта се постарите станови, чија цена се движи до 1.200 евра за квадрат, во зависност од локацијата и состојбата на објектот.
Најбарани се помалите и функционални станови од 40 до 50 квадратни метри со една спална соба за туристичко издавање. Покрај купувачите од цела Македонија, висок интерес покажуваат и пензионери од западноевропските земји, лица кои работат во странство како и дијаспората.
Понатамошниот тек и развојот на пазарот на недвижности во Охрид, сепак, во голема мера ќе зависат и од идниот статус на регионот под заштита на УНЕСКО, што останува клучен фактор за сите идни градежни активности и инвеститорски планови.Прогнозите на агентите се дека идниот период побарувачката за недвижности во Охрид ќе остане стабилна со понатамошен поумерен раст на цените.