Вишиот суд во Белград синоќа (31.01.)им одреди притвор на тројца уапсени по заплената на пет тони марихуана во селото Коњух кај Крушевац. Притворот им е одреден на Н.С., Р.С. и И.Д. односно поради опасност од бегство, за да не се влијае врз сведоците, за да не се повтори кривичното дело и поради нарушување на јавниот ред и мир, соопштија од тој суд, пишуваат српските медиуми.
Јавното обвинителство за организиран криминал претходно вечерва објави дека е донесена наредба за спроведување истрага против Александар Мијајловиќ, Небојша Спасојевиќ, Раде Спасојевиќ, Иван Драгниќ и Урош Младеновски.
Како што е наведено во соопштението, оваа организирана криминална група дејствувала на меѓународно ниво, со тоа што во текот на јануари оваа година набавила повеќе од пет тони опојна дрога марихуана на територијата на Македонија.
Според планот на организаторот, осомничениот Иван Драгниќ ја транспортирал дрогата преку границата до магацинот на семејството на осомничените Спасојевиќ, од каде што осомничениот Урош Младеновски ја носел за понатамошна продажба.
Се додава дека е особено индикативно што осомничениот Иван Драгниќ е косопственик на компанијата „Алфафарм“, која е регистрирана во скопско за производство и преработка на медицински канабис.
Покрај марихуаната, на 29 јануари, полицијата заплени 4 автоматски пушки, еден рачен фрлач – зоља и повеќе од 1,5 милиони динари.
Проценетата вредност на запленетите дроги е околу 50 милиони евра.
Министерот за внатрешни работи Ивица Дачиќ, по пристигнувањето на местото на заплената, истакна дека ова е најголемата заплена на дрога во Србија досега.
На денот на запленувањето на наркотиците, министерот Дачиќ изјави дека дрогата најверојатно пристигнала „од јужните соседи“, без да прецизира на кои соседи мисли.