„Во врска со НАТО сертификатот, она што го цело време потенцираат, јас го имам домашниот односно националниот безбедносен сертификат, ова е безбедносен сертификат државна тајна, којшто е издаден во време на СДСМ и на ДУИ, не е издаден во време на ВМРО-ДПМНЕ. Значи ова е највисокиот степен што постои во државата”, појасни Ковачки.
Генералниот секретар на ВМРО-ДПМНЕ, Ковачки обзнани дека го поседува и највисокиот НАТО сертификат, како и фактот дека е предводник на македонската делегација на седниците на НАТО парламентарното собрание и оти учествува на затворени седници на тоа собрание.
„Поседувам и највисок НАТО сертификат значи учествувам и на затворени седници на НАТО парламентарното собрание каде што ја предводам македонската делегација. Така да, сите овие лаги и прават штета не само на партијата, туку и прават штета и на Македонија и мислам дека треба да престанат со вакви напади кон личности, затоа што ако сакаат да бидат државотворна и одговорна партија, мора да почнат да се занимаваат малку со креирање политики, коишто одговараат на нивното портфолио“, беше дециден Ковачки.