Долго најавуваниот споменик на бардот на македонската патриотска песна Јонче Христовски (1931-2000) конечно е поставен во неговиот роден град Битола, а свечено ќе биде откриен на Денот на ослободувањето на градот на конзулите 4 ноември.
Скулптурата е сместена на самиот влез во чаршијата, во непосредна близина на препознатливиот дрвен мост на реката Драгор, познат меѓу битолчани како Мостот на вљубените.
Проектот во чест на пејачот, текстописец и композитор се реализира со поддршка и документација од општината, а самата изработка на споменикот е донација од Стопанска банка АД Битола.
Со спомен-обележјето Битола и Македонија ѝ се оддолжуваат на својата исклучително популарна музичка легенда до ден-денешен за вонвременските хитови „Македонско девојче“, „Едно име имаме“, „Ако умрам ил’ загинам“, „Ој Вардаре македонски“, „Куќа имам на Пелистер“, „Ај засвирете ми чалгии“, „Животе мој“ итн.