„Ние веруваме во европските вредности и ќе продолжиме во оваа насока за конечно да најдеме решение за тековниот застој“, изјави премиерот Христијан Мицкоски на Самитот „Конкордија“ во Њујорк, што се одржа паралелно со Генералното собрание на ОН.
Македонскиот премиер , за време на панел дискусијата, се осврна на пречките во процесот на европска интеграција и – како што нагласи – на обидите на одредени земји-членки на ЕУ да го искористат овој процес за да го променат македонскиот идентитет.
„Нашето патување го започнавме пред речиси две и пол децении. За жал, поради одредени вештачки причини, сè уште не успеавме да станеме дел од ЕУ. Можеби еден ден ќе ја достигнеме оваа важна пресвртница. Во меѓувреме, постои огромна фрустрација кај македонските граѓани бидејќи во минатото направивме многу отстапки: го променивме знамето, неколку пати го менувавме Уставот, па дури и го променивме уставното име – а сепак, сè тоа наликува на приказна без крај“, рече Мицкоски.
Премиерот нагласи дека постојат одредени земји-членки на ЕУ кои, според него, се обидуваат да го променат идентитетот на Северна Македонија наместо нејзините институции.
„За жал, постојат земји-членки кои сакаат да ги решат билатералните прашања не преку промена на нашите институции, туку преку промена на нашиот идентитет. Ние сме жртви на одреден вид притисок: станува збор за ситуација од типот ‚или си внатре или си надвор‘, а ако сакаш да бидеш внатре, мора да го прифатиш она што се бара од тебе“, рече Мицкоски.
На прашањето дали има и позитивни пораки од Брисел, Мицкоски истакна дека пораките од самитот ЕУ-Западен Балкан во Тиват биле исклучително позитивни.