– Ние имаме принципелен договор како коалициски партнери во Владата, сите три политички структури, тоа се коалицијата предводена од ВМРО-ДПМНЕ, коалицијата Вреди и политичката партија ЗНАМ. Најавивме дека во мај или јуни ќе имаме реконструкција во Владата. Многу од прашањата за време и пред реконструкцијата ќе бидат ставени на маса и ќе разговараме за тоа – рече Мицкоски во одговор на новинарско прашање дали ќе биде разрешен министерот Фатмир Лимани по објавувањето негова фотографија со лидерот на ДУИ Али Ахмети.
Мицкоски нагласува дека како владина коалиција имаат многу добра соработка и оти не гледа причина за коалицирање со нови политички партии.
– Како коалиција имаме исклучително коректна соработка и во моментот не гледам простор за коалициски договори и преговори со други политички партии. Затоа што, ќе повторам, образот го чувате цел живот, а го губите само еднаш. – рече Мицкоски по пуштањето во употреба на реконструираниот Регионален центар за средно стручно образование „Моша Пијаде“ во општина Тетово.