Градоначалникот на Гостивар, Валбон Лимани, се огласи по воведената привремена забрана за користење на водата за пиење од градскиот водовод, повикувајќи ги граѓаните да ја почитуваат мерката и да се информираат исклучиво од официјални извори. Во објава на социјалните мрежи, Лимани наведува дека според редовните анализи што ги спроведувало ЈП „Комуналец“, досега испитаните примероци покажувале дека параметрите на водата биле во рамките на законски дозволените вредности. Тој посочува дека по добиената пријава, Јавното обвинителство, полицијата и другите надлежни институции извршиле дополнителен увид и земале нови примероци за лабораториско испитување.
- „До објавувањето на официјалните резултати, по препорака на Агенцијата за храна и ветеринарство, воведена е привремена забрана за користење на водата за пиење и за подготовка на храна. Апелирам оваа мерка целосно да се почитува. Таа е превентивна и е донесена заради заштита на здравјето на граѓаните“, наведува Лимани.
Во однос на тврдењата дека дошло до мешање на канализациска и водоводна вода, градоначалникот вели дека информациите од ЈП „Комуналец“ укажуваат оти на посочената локација нема канализациска мрежа, но додава дека сите наводи се предмет на проверка и дека конечната оценка ќе ја дадат надлежните институции. Лимани истакнува и дека во моментов нема официјален медицински или лабораториски доказ дека пријавените стомачни тегоби се предизвикани од водата од градскиот водовод.
- „Причината мора да се утврди стручно и врз основа на релевантни анализи“, наведува тој.
Според градоначалникот, Општина Гостивар е во постојан контакт со сите надлежни институции и целосно соработува во постапката, а официјалните резултати ќе бидат јавно објавени веднаш штом бидат достапни.
- „Ги повикувам граѓаните да останат смирени, да ја почитуваат привремената забрана и да се информираат од официјални извори. Во вакви моменти, одговорноста на институциите е да ги утврдат фактите, а одговорноста на сите нас е да не шириме непроверени информации“, порача Лимани.