Зголемувањето на економската соработка, трговската размена и привлекувањето нови инвестиции беа во фокусот на средбите што вицепремиерот и министер за транспорт, Александар Николоски, ги оствари со турските министри за трговија и транспорт во рамките на Македонско-турскиот бизнис форум во Истанбул.
Николоски се сретна со министерот за трговија на Турција, Омер Болат, како и со министерот за транспорт и инфраструктура, Абдулкадир Уралоглу. На средбите беше потврдена заедничката определба за натамошно продлабочување на економските односи и создавање нови можности за соработка меѓу двете земји.
Соговорниците разговараа за конкретни мерки насочени кон зголемување на трговската размена, поттикнување на инвестициите и унапредување на деловната клима за компаниите од Македонија и Турција.
„Турција е еден од најзначајните економски и трговски партнери на Македонија. Долгогодишните пријателски односи претставуваат цврста основа за успешен развој на економската соработка. Нашата цел е овие односи да ги подигнеме на уште повисоко ниво преку нови иницијативи и засилена економска активност“, изјави Николоски.
Посебен акцент на средбите беше ставен на инфраструктурниот развој и регионалното поврзување. Вицепремиерот истакна дека во Македонија се реализира најголемиот инвестициски циклус за изградба и модернизација на инфраструктурата и ги повика заинтересираните турски компании да учествуваат на меѓународните тендери и повици.
На крајот од средбите беше констатирано дека Македонија и Турција ќе продолжат да го развиваат партнерството засновано на доверба, пријателство и заедничка визија за економски развој и поголема регионална соработка.