Откако на минатото рочиште, обвинителството во својот воведен говор го презентираше обвинението за катастрофалниот пожар во дискотеката „Пулс“ во Кочани, денеска во судскиот комплекс во „Идризово“ продолжува судскиот процес во кој се очекува обвинетите да се произнесат дали се чувствуваат виновни или не, по што ќе следуваат воведните зборови на одбраната.
Во пожарот, на 16 март годинава, загинаа 63 лица, меѓу кои и деца, а повеќе од 200 беа повредени.
На минатото рочиште, јавниот обвинител Борче Јанев истакна дека се бара одговорност „по име и презиме“ за сите кои дозволиле „Пулс“ да функционира како „смртоносна стапица“.
Тој рече дека катастрофата не е резултат само на активираната пиротехника, туку на долгогодишен институционален молк, игнорирана опасност и неказнивост.
Со обвинението се опфатени 34 физички и три правни лица. Меѓу нив се сопственици на локали, поранешни градоначалници, инспектори, членови на обезбедување, управители и државни службеници.
Тие се товарат за низа кривични дела поврзани со загрозување на јавната безбедност, незаконско работење и тешки последици по животот и здравјето.
Судењето се одвива под строги безбедносни протоколи. Во судницата присуствуваат обвинетите, семејства на настраданите, домашни и странски новинари, како и претставници на обвинителството и одбраната.
Процесот го води судијката Дијана Груевска Илиевска, која уште на првото рочиште најави дека нема да дозволи злоупотреби и непотребни одложувања, предупредувајќи дека сите страни мора да почитуваат дисциплина и рокови.