Измамата била откриена случајно – Фондот за здравствено осигурување го вратил извештајот до Клиниката за неврологија бидејќи факсимилот на еден од лекарите не се совпаѓал, објави ТВ Сител.
Пациент со помош на вештачка интелигенција изработил конзилијарно мислење за терапија што се наоѓа на позитивната листа на лекови. При проверката на Клиниката било утврдено дека покрај факсимилот, погрешни биле и останатите печати, дел од имињата на невролозите, како и називот на установата. Во документот стоел „Институт за рехабилитација – универзитетска клиника за неврологија“, каква што не постои во здравствениот регистар.
– Кога го погледнавме конзилијарното мислење кое што мислевме дека е издадено од нашата клиника, сфативме дека станува збор за документ кој што е направен со вештачка интелигенција и комплетно лажен и веројатно тоа и истрагата понатаму ќе го покаже – изјави асс. д-р Јован Божиновски, директор на Клиниката за неврологија.
Лицето со години било пациент на Неврологија и за својата дијагноза ја добивало оваа терапија, за која биле потребни потписи и печати од тројца доктори.
Случајот е пријавен во петокот до Министерството за здравство.
– Овде се отвора прашање дали вакви конзилијарни мислења веќе поминале за лекови, за боледувања или за бањско лекување. Сериозен е проблемот – предупредува д-р Божиновски.