„Ако не го слушаат политичките партии гласот на народот, ние ќе бидеме таму – обединети, искрени и храбри – сами да ја направиме промената. Во наредните месеци ќе градиме платформа, што го става граѓанинот во центарот.“ – објави информативниот портал на албански јазик „Тетова сот“ во својата вест со наслов „Хаќим Рамадани најавува формирање нова политичка партија“.
Порталот ја пренесува објавата на Рамадани вечерва на општествената мрежа, кој, покрај другото, наведува: „За време на неодамнешните средби со нашите граѓани и претставници на дијаспората, слушнав многу гласови што бараат вистински промени и претставување со одговорност. Ги прифаќам овие гласови со целосна посветеност. Нема да застанеме. Ќе продолжиме да бидеме гласот на граѓаните. До следната фаза на политичкиот ангажман, ќе продолжам да бидам активен во општествениот живот, претставувајќи го населението на Брвеница на секое ниво каде што е потребен гласот на граѓанинот. Во наредните месеци ќе продолжиме да се среќаваме, да слушаме и заедно да градиме платформа, што го става граѓанинот во центарот.“
Инаку, Хаќим Рамадани настапи на годинашниве локални избори како кандидат на коалицијата Вреди за претседател на селската општина Брвеница во тетовскиот регион. Но, тој не го победи староновиот градоначалник Јовица Илиевски од ВМРО ДПМНЕ, иако со поддршка и на ДУИ организираше масовни доаѓања на албанското иселеништво од Западна Европа да гласа за него. Обидувајќи се, како што самиот порачуваше, да им нанесе „национален пораз на Христијан Мицкоски и на Македонците“, Рамадани доживеа неговата платформа на етничка поларизација и создавање силен етнички набој за гласање врз етничка основа да бидат поразени со придонес и од Албанци, кои гласаа не за него, туку во низа случаи токму за кандидатот-Македонец.