Потпретседателот на ДУИ Бујар Османи реагираше по објавата дека Предлог-законот за фер и соодветна застапеност добил позитивно мислење од Венецијанската комисија, објави ТВ21. Османи вели дека „овој предлог-закон не може да го замени механизмот за балансирање“, бидејќи според него, „има неколку недостатоци“.
Телевизијата ја цитира изјавата, што ја даде Османи во овој контекст: „Зошто новиот закон за „фер и соодветна застапеност е слаб и не може да биде замена за балансерот: бидејќи повеќе не е задолжителен, туку ориентирачки; бидејќи не дејствува автоматски, туку зависи од волјата на администрацијата; бидејќи не го блокира донесувањето одлуки кога е нарушена застапеноста, туку само ја евидентира; бидејќи не дејствува ex ante туку ex post; бидејќи не создава директни правни последици за непочитување; бидејќи ја поместува еднаквоста од закон во јавна политика; бидејќи дозволува толкување, одложување и релативизација; бидејќи не гарантира вистинска застапеност, туку управување со застапеноста. Балансерот функционираше затоа што не остави простор за импровизација. Овој закон остава само простор. А кога законот создава простор, нееднаквоста секогаш го експлоатира. Не треба да помине!“