Заедничката истрага на Министерството за внатрешни работи и американското Федерално истражно биро (ФБИ) доведе до откривање на администраторот на нелегалниот онлајн пазар „OLVX“.
Преку оваа платформа се продавале украдени лични податоци, пристапни информации до кориснички сметки и компјутерски мрежи, како и алатки наменети за извршување компјутерски криминал.
Во врска со случајот, против 20-годишник од тетовското село Голема Речица е поднесена кривична пријава.
Пријавата против Е.А. ја поднел Секторот за компјутерски криминал и дигитална форензика при МВР до Основното јавно обвинителство во Тетово.
Тој е осомничен за кривичните дела „компјутерска измама“, „злоупотреба на лични податоци“ и „производство и дистрибуција на детска порнографија“.
Истрагата започнала по добиени информации од ФБИ, по што била воспоставена координирана соработка меѓу двете институции за откривање и сузбивање на криминалните активности поврзани со платформата „OLVX“.
Обезбедените докази укажуваат дека пријавениот во периодот од 2023 до 2025 година управувал со домени и веб-страници поврзани со оваа платформа, која функционирала како нелегален пазар за продажба на украдени дигитални податоци, софтверски алатки и услуги за извршување кривични дела.
Главни корисници на платформата биле сајбер-криминалци кои купувале и продавале лични податоци и пристапни податоци за кориснички сметки и компјутерски мрежи на жртви.
За време на функционирањето на пазарот биле понудени повеќе од 1.500 украдени пристапни податоци.
Истрагата утврдила и дека во периодот од 2025 до 2026 година пријавениот управувал со нелегална група на комуникациската апликација „Телеграм“, под името „ONEMILI“.
Преку групата биле нудени услуги и софтверски алатки за извршување компјутерски кривични дела, меѓу кои и измами поврзани со незаконско враќање парични средства.
Дополнително, според МВР, биле обезбедени докази дека пријавениот преку „Телеграм“ набавувал и поседувал материјали со сексуална злоупотреба на деца.
Од Министерството за внатрешни работи посочуваат дека станува збор за првата заедничка координирана сајбер-операција меѓу МВР и ФБИ.
Операцијата, според институцијата, ја потврдува важноста на меѓународната полициска соработка во откривањето и спречувањето на современите облици на организиран компјутерски криминал.
МВР најавува дека преку Секторот за компјутерски криминал и дигитална форензика ќе продолжи со активностите за сузбивање на сајбер-криминалот, заштита на личните податоци и унапредување на безбедноста на граѓаните во дигиталниот простор.
Од Министерството оценуваат дека соработката со ФБИ претставува значаен чекор во зајакнувањето на капацитетите за справување со прекуграничниот компјутерски криминал.