Генералниот секретар на НАТО, Марк Руте, предупредува дека Европа се соочува со својот најопасниот безбедносен момент од крајот на Втората светска војна. Во интервју за „Билд“, тој зборуваше за војната во Украина, можниот руски напад, улогата на Европа и САД и зошто мирот може да се зачува само преку сила.
Руте вели дека мирот не е прашање на надеж, туку на подготовка. Според него, сојузниците мора да направат две работи: да ги зголемат трошоците за одбрана и производството на оружје и да обезбедат Украина да остане воено силна. Тој предупредува дека руската контрола врз цела Украина би имала огромни последици за НАТО и би ги принудила сојузниците да трошат дури и повеќе отколку што веќе се договориле.
Тој особено ја истакнува Германија, која, вели тој, ја презеде водечката улога со нагло зголемување на трошоците за одбрана и вели дека остатокот од Европа мора да го следи примерот.
Според Руте, причината зошто војната не завршува има име и презиме – Владимир Путин. Генералниот секретар на НАТО тврди дека рускиот претседател е подготвен да жртвува огромен број од сопствениот народ за минимални територијални добивки. Тој зборува за проценките дека до 1,1 милион луѓе се убиени или ранети во руските редови, додека напредокот на терен е помал од еден процент од украинската територија во споредба со почетокот на годината.
Руте детално го опишува моделот на безбедносни гаранции што се развива за периодот по евентуалното прекинување на огнот или мировниот договор. Првото ниво се силни и добро опремени украински вооружени сили, способни да ја бранат земјата на долг рок. Второто ниво е т.н. „коалиција на добронамерните“, предводена од Франција и Велика Британија, со учество на Германија и други европски земји. Третото ниво се Соединетите Американски Држави, чиј придонес, изјави Руте за „Билд“, е клучен.
Прашан за евентуалното испраќање странски војници во Украина, Руте потврдува дека оваа опција се разгледува. Тој вели дека некои европски земји сигнализирале подготвеност да учествуваат со војници доколку е потребно и дека моделите на дејствување на копно, море и во воздух моментално се разработуваат, иако деталите сè уште не се објавени.
За разлика од многу европски критичари, Руте отворено го брани Доналд Трамп. Тој тврди дека Трамп е единствениот лидер кој успеал да го донесе Путин на преговарачка маса и кој може да го принуди на мировен договор. Тој признава дека американскиот претседател понекогаш е нетрпелив и фрустриран, но нагласува дека ја разбира својата одговорност и останува цврсто посветен на алијансата.
Руте ги отфрла тврдењата за американско повлекување од Европа. Тој нагласува дека САД имаат директен безбедносен интерес во силна Европа – за стабилноста на континентот, безбедноста на Арктикот и контролата на Северниот Атлантик. Според него, Вашингтон останува ангажиран и конвенционално и нуклеарно, а повлекувањето од Европа не е проблем.
Генералниот секретар потсетува дека Русија има околу 140 милиони жители, додека земјите од НАТО заедно бројат речиси милијарда. Пораката е јасна: проблемот не се ресурсите, туку политичката волја. Руте е убеден дека европската јавност, вклучително и младите луѓе кои денес протестираат против регрутацијата, ја разбира сериозноста на заканата и би биле подготвени да ги бранат своите земји во случај на реална опасност.
На крајот од интервјуто Руте ја поврзува европската безбедност со глобалните односи, предупредувајќи за поврзаноста меѓу Москва и Пекинг. Тој верува дека движењето на Кина кон Тајван би можело да ја вклучи Русија во дестабилизацијата на Европа, поради што НАТО мора да биде подготвено за повеќекратни кризи истовремено.