На 23 декември Националниот совет ќе ја одржи четвртата седница за спроведувањето на Националната развојна стратегија 2024-2044.
Четириесет и четири заклучоци се произлезени од 11 состаноци на Работниот комитет во рамки на Националната развојна стратегија.
Од октомври минатата година, до сега, биле опфатени прашања од областа на безбедноста во сообраќајот, внатрешната безбедносна политика, владеењето на правото, дигитализација, енергетика, локален и регионален развој, миграциските прашања, надворешната политика и трговија, економија, патна и железничка инфраструктура, како и управувањето со вонредните состојби, брифираат од Владата.
Донесените мерки, активности, како и потребата од законски измени за одредени прашања, продолжуваат до Националниот совет, во кој има над 40 членови од институциите, бизнис секторот, невладините организации, како и експерти од наставно-научната фела, а со кој претседава премиерот.
На досега одржаните три седници на Советот, се утврдуваат следните чекори, а во насока на постигнување на целта на Националната развојна стратегија, визија за развој на државата која ќе ја следи и реформската агенда на патот кон Европската Унија.
Степенот на реализација на досегашните мерки е во различна фаза, а еден од проектите кои произлегле од НРС е и неодамна промовираниот Ресурсен центар за поддршка на локалниот развој. Веќе на почеток на идната година, се планира да започне и проектот за Е-апостил печат, како дел од утврдените проекти.
На nrs.mk, секој може да го следи спроведувањето на проектите, но и да даде свој придонес со идеи.
Целта на НРС е зајакнување на конкурентноста на економијата преку функционален и иновативен екосистем, усовршување на вештините, вклученоста и отпорноста на граѓаните. Целите на НРС ќе се остваруваат преку шест стратешки области: Одржлива, иновативна и конкурентна економија, Одржлив локален и регионален развој, Демографска ревитализација, социјален и културен развој, Сигурно, безбедно и отпорно општество, Владеење на правото и добро управување и Зелена трансформација.
Националната развојна стратегија 2024-2044 е документ на кој пет години работеле околу 200 експерти од разни области. Донесен е во октомври 2024 година, во Собранието со поддршка на сите политички чинители.