Неверојатна ситуација пред возвратниот натпревар меѓу Алкалоид и АЕК од финалето на Европскиот куп: гостинските ракометари беа во поттрибинскиот простор од арената „Борис Трајковски“ во Скопје, но не излегоа на терен, па натпреварот не се одигра!
Причина се заканите од навивачите на АЕК до раководството на клубот од Атина да не го играат реваншот поради вратени два автобуса со нивни „колеги“ од патарината пред Скопје?!
Тие што дошле во главниот град на Македонија отишле 1,5 час пред мечот пред хотелот кадешто се сместени нивните миленици и им „наредиле“ да не му излезат на мегдан на освојувачот на Купот на Македонија, а тие, во знак на солидарност со вратените, исто така тргнале назад за Грција.
Делот од трибината наменет за 200 грчки навивачи остана празен, а полната сала и половина час од времето кога требаше да почне дуелот чекаше на своите места, за на крајот да ја дочека официјалната информација дека натпреварот нема да се одигра вечерва!
Алкалоид славеше со 29:25 на првата средба во Атина.