Претседателката Гордана Сиљановска Давкова вчера присуствувала на официјалниот прием, којшто за шефовите на делегациите на Меѓународна конференција за финансирање на развојот под покровителство на ОН го приредил Кралот на Шпанија, Фелипе VI и Кралицата Летиција.
На настанот од глобално значење присуствуваат седумдесетина шефови на држави и влади.
,,🇲🇰🇪🇸🇺🇳 Со особена чест присуствував на приемот што го приредија Н. В. Кралот Фелипе VI и Кралицата Летиција во величествениот амбиент на кралската летна резиденција, дворецот Алказар де Севиља, прогласен за светско културно наследство на УНЕСКО.
Во срдечна атмосфера се водеа инспиративни разговори, во духот на заемна почит и разбирање.
Приемот се одржа во пресрет на 4. Меѓународна конференција за финансирање на развојот под покровителство на ОН, којашто ја нагласува потребата за одржлив развој, правичен пристап до финансиски ресурси и зајакнување на глобалната солидарност.
Искрена благодарност до домаќините за можноста да размениме мислења за клучните предизвици на нашето време”, објави Сиљановска Давкова.
Според објавените фотографии на нејзиниот Фејсбук профил македонската претседателка седи на главната маса заедно со Кралот и Кралицата на Шпанија, генералниот секретар на Обединетите Нации Гутереш, шпанскиот премиер Педро Санчез и неговата сопруга, претседателката на Индија Дроупаду Мурму, претседателката на Европската Комисија Урсула Фон Дер Лајен, министерот за надворешни работи на Катар Касим Ал Таму, и уругвајскиот претседател Јаманду Орси.
Претседателката Гордана Сиљановска-Давкова од вчера престојува во работна посета на Кралството Шпанија и ќе се обрати на првата пленарна сесија на 4. Меѓународна конференција за финансирање на развојот (FfD4), којашто под покровителство на ООН се одржува во Севиља.
Целта на лидерскиот собир е изнаоѓање на решенија за справувањето со финансиските предизвици во исполнувањето на Целите за одржливиот развој и Агендата 2030, реформирање на меѓународната финансиска архитектура и поттикнување на инвестиции од страна на приватниот сектор.
На Конференцијата, на којашто е најавено учество на педесетина шефови на држави и влади, претставници на меѓународните организации, на бизнис заедниците и граѓанското општество, треба да биде усвоен „Договорот од Севиља“.
Во рамки на посетата, предвидено е претседателката да оствари билатерална средба со премиерот на Шпанија, Педро Санчез.