Пратеникот на ВМРО-ДПМНЕ и член на Анкетната комисија, Бојан Стојаноски, во емисијата „Анализа“ на 24 ТВ порача дека комисијата е целосно подготвена да работи интензивно, па дури и по 24 часа дневно, за да се расветлат сите трагедии со вкупно 138 жртви.
„Оваа анкетна комисија е формирана токму за да ги опфати сите случаи и да даде јасни одговори пред граѓаните и пред Собранието. Секое релевантно лице ќе биде сослушано – без исклучок. Ако треба, ќе работиме нон-стоп“, нагласи Стојаноски.
Тој категорично ги отфрли обвинувањата за саботажа или одолговлекување.
„Не бегаме и не криеме ништо. Во нашиот предлог-одлука токму овој случај (модуларната болница во Тетово) го ставивме како прв. Постои јасна процедура според Деловникот и ние ќе ја почитуваме до буква, но тоа не значи дека ќе дозволиме одолговлекување. Овој случај ќе има апсолутен приоритет“, рече Стојаноски.
Комисијата има рок од 45 дена за сослушувања, по што следуваат уште 30 дена за изготвување на конечниот извештај, кој потоа ќе биде доставен до Собранието и до надлежните институции.
„Кога има волја, 45 дена се сосема доволно. Сите предлози за сведоци од сите пратеници ќе бидат земени предвид. Никој нема да биде игнориран“, порача Стојаноски.