Барајќи виновници за неприфатениот амандман за додавање „модерен“ пред „македонски јазик и идентитет“ на четири места во извештајот на Европскиот парламент за напредокот на Македонија во пристапувањето кон Европската унија во Бугарија го вперија прстот и кон еврокомесарката за проширување Марта Кос.
„Така како што јас го гледам политичкиот процес, предупредив уште во ноември, кога беше избрана, буквално на денот на нејзиниот избор, дека на оваа позиција доаѓа човек што самиот и членовите на неговата партија покажаа, да кажеме така, недобар однос кон Бугарија. И уште тогаш предупредив дека изборот на г-ѓа Кос со реториката што знаеме дека ја носи ќе претставува проблем за Бугарија, за бугарската страна и за нашата работа на извештајот за пристапувањето на Република Северна Македонија. Г-ѓа Кос, за време на неколку средби со пратениците на Комитетот AFET (Комитет за надворешни работи), даде неколку интересни изјави, каде што формулираше неколку свои тези, кои подоцна видовме дека се рефлектираат во извештајот. Инаку, во Европскиот парламент нема униформност во врска со тоа кој како гласа, дури и во поединечните политички групи, дури и во нашата група на европски конзервативци и реформисти“, изјави бугарскиот европратеник Ивајло Валчев, предлагач на антимакедонскиот амандман, за Бугарската национална телевизија (БНТ).
Неговиот „соборец“ во Европскиот парламент, Радан Канев, вчера се пожали на тројцата европратеници од партијата на унгарскиот премиер Виктор Орбан за блокирањето на петте бугарски амандмани на извештајот за Македонија.