Македонија

Во Македонија годишно се регистрираат околу 5.000 случаи

Во последните две години е забележан пораст на бројот на пациенти помлади од 50 години, а најмладата пациентка на Клиниката за неврологија имала само 16 години

Светски ден на мозочниот удар се одбележува денеска со акцент на превенцијата, навременото препознавање на симптомите и унапредувањето на здравствената грижа за пациентите. По тој повод во организација на Универзитетската клиника за неврологија ќе се одржи централен настан на Медицинскиот факултет.

На настанот, како што е најавено, ќе присуствуваат министерот за здравство, Сашо Клековски, директорот на Фондот за здравствено осигурување, Златко Перински, како и директорот на Клиниката за неврологија, д-р Јован Божиновски.

Мозочниот удар е итна медицинска состојба кај која секоја минута е од огромно значење.Лекарите потсетуваат дека навременото препознавање на симптомите и брзото повикување медицинска помош можат да спасат живот и да спречат трајни последици.

Во Македонија годишно се регистрираат околу 5.000 нови случаи, а невролозите предупредуваат дека болеста сè почесто ги погодува и помладите лица. Во последните две години е забележан пораст на бројот на пациенти помлади од 50 години, а најмладата пациентка на Клиниката за неврологија имала само 16 години.

Кај 30 до 40 проценти од пациентите остануваат трајни последици, како парализа, нарушувања на говорот, проблеми со памтењето или физичка попреченост. Дополнителен проблем е доцнењето на медицинската помош, особено во помалите градови, каде што недостигот од возила и медицински персонал може да го одложи лекувањето.

Лекарите препорачуваат да се запомнат петте главни предупредувачки знаци, како нарушена рамнотежа, ненадејно заматување на видот, двојно гледање или губење на видот на едното или двете очи, искривување на лицето, слабост во рацете, нарушен говор…

При појава на кој било од овие симптоми, веднаш треба да се повика итна медицинска помош на 194. Важно е да се запомни и точното време кога започнале симптомите, бидејќи тоа може да влијае врз изборот на терапијата.

Покрај брзата реакција, важна е и превенцијата. Високиот крвен притисок е еден од најзначајните ризик-фактори, а опасноста ја зголемуваат и пушењето, дијабетесот, високиот холестерол, неправилниот срцев ритам, физичката неактивност, прекумерното консумирање алкохол и зголемената телесна тежина. Редовното мерење на крвниот притисок, контролата на хроничните заболувања и лекарските прегледи се важни чекори за намалување на ризикот.

Најнови вести од: Македонија

Аларм: Секое 10-то дете во Македонија изложено на сексуална злоупотреба на интернет

Секое десетто дете во Македонија на возраст од 12 до 17 години коешто користело интернет било изложено на сексуална експлоатација и злоупотреба. Станува збор за околу 12.000 деца, бројка што ја потврдува и последното истражување на УНИЦЕФ.

(Видео): Проблемот со кравите во Крива Паланка стигна до Обвинителството – Општината поднесе кривични пријави

Крива Паланка, заедно со жителите од засегнатите села, поднесоа неколку кривични пријави до Обвинителството поради институционално непостапување по извршни решенија за одземање на добитокот што слободно шета во градот и пошироко.

УКИМ не платил сметки за струја, ако не се плати долгот – факултетите ќе останат во мрак

Дел од државните факултети и Ректоратот од утринава се во мрак поради неплатени сметки за електрична енергија. Ова за Телма го потврдија и од ЕВН. Без струја останаа Машинскиот, Електротехничкиот, Природно – математичкиот, земјоделскиот факултет, но и зградата на Ректоратот.

Велковски: Во владина постапка се измените на Законот за детска заштита, од 2027 поголема поддршка за децата со посебни потреби

Измените на Законот за детска заштита веќе се во владина процедура, каде се предвидува зголемување на постоечките државни износи за поддршка, со посебен фокус на децата со посебни потреби, изјави министерот за труд и социјална политика и млади, Ѓоко Велковски одговарајќи на пратенички прашања во Собранието, нагласувајќи дека се очекува овие измени брзо да ја поминат собраниската процедура и од 1 јануари 2027 година децата од оваа категорија да добијат зголемени средства.

Николоски: Од 1 јануари 2027 државата ќе биде единствен организатор на интернет-игрите на среќа и ВЛТ терминалите

Владата останува на ставот за ограничување на игрите на среќа и веќе презеде конкретни законски мерки со кои се намалуваат можностите за нивно организирање, истакна заменик претседателот на Владата и министер за транспорт, Александар Николоски, одговарајќи на пратеничко прашање на Јована Мојсоска од Левица поврзано со работењето на Државна лотарија, односно дали Владата ќе иницира разрешување на директорот на Државна лотарија, Александар Климовски, како и дали ќе биде затворена платформата за онлајн коцкање „Мегавин“.

To top